LEGAZPI CITY-Sinaysay kan Office of Civil Defense (OCD) Bicol na posibleng mamatean sa Bicol Region an pigtutubudang ‘The Big One’ sa Metro Manila, alagad bako direktarang makakaapektar ini sa rehiyon.
Segun ki OCD Bicol Spokesperson Gremil Alexis Naz, na mantang posibleng maeksperyensyahan ini sa mga kataraid na rehiyon, bako ining masyadong makusog huli sa mga pinagbabantayan man na mga faults sa rehiyon, arog kan Sta. Elena Fault.
Posible suboot ini alagad bako direkta sa tahaw kan pagigin harani sa direksyon kan Camarines Norte, asin sa North Western kan Bicol sa Metro Manila.
Paliwanag kan opisyal na igwang mga pinagbabantayang fault na posibleng magkawsa man nin makukusog na pagyugo, na nag-aabot sa Intensity III o Intensity IV, orog na sa parte kan Sorsogon, afuera sa ‘The Big One’.
Medyo harayo man suboot an parte kan Albay, asin wara man nin epekto an aktibidad kan Bulkang Mayon sa piglalaomang makusog na pagyugo.
Katakod kaini, padagos an saindang exercises asin pag-aadal manungod sa nasabing phenomena.
Nagpagirumdom man an opisyal sa mga lokal na gobierno asin publiko na magkaigwa nin koordinasyon sa saindang pinakahararaning lokalidad sa Maynila manungod sa posibleng mga maapektaran kaini.
Tinawan doon man niya na warang makakapag-pinpoint kun nuarin o anong oras matama an ‘The Big One’, kaya dapat na magin handa an mga namamanwaan.
