Handang magtao an Department of the Interior and Local Government (DILG) nin P10 million na pabuya sa makakatao nin impormasyon nganing maarestar an negosyanteng si Atong Ang, na nahahampang sa kasong kidnapping katakod kan missing sabungero.
Segun ki DILG Secretary Jonvic Remulla, piglalaoman na pormal nang iaanunsiyar an reward money ngonian na hapon, Huwebes, Enero 15, kasunod kan pagtiripon kan mga opisyales, bilang paagi nganing ma-engganyar si Ang na magsuko.
Sa sarong interview, sinabi ni Remulla na base sa monitoring kan gobyerno, yaon pa si Ang sa Pilipinas, partikular na sa Luzon.
Mientrastanto, pigkokonsidera kan DILG chief na “armed and dangerous” si Ang, huli sa mga alegasyon na imbwelto ini sa paggadan sa labi sa sanggatos katawo, siring man an numero kan mga bodyguards na suboot kaiba kaini.
Dugang pa kaini na preparado an mga awtoridad sa anuman na pangyayari kun maglaban si Ang sa oras nin pag-arestar.
Segun ki PNP acting chief Police Lieutenant General Jose Melencio Nartatez Jr., mas pinahiwas pa an koordinasyon kan kapulisan sa Bureau of Immigration bilang parte kan manhunt.
Si Ang kabale sa 18 indibidwal na may mandamiento de aresto katakod kan pagkawara kan mga sabungero.
Segun sa PNP, nahahampang ini sa 15 counts nin kidnapping asin serious illegal detention asin apat na kaso nin kidnapping with homicide.
Sa ibong na lado, yaon na sa kustodiya kan mga pulis an iba pang 17 akusado sa mga nawawarang sabungero.
 is ready to offer a P10 million reward for information leading to the arrest of businessman Atong Ang, who is facing kidnapping charges in connection with the missing sabungero.){kind=link}