LEGAZPI CITY-Ipighayag ni Interior Secretary Jonvic Remulla na nanotaran suboot sa Cavite an puganteng negosyante na si Atong Ang.
Sinabi ni Remulla na tulos nagsagibo nin operasyon an humigit-kumulang 400 tawohan kan Criminal Investigation and Detection Group o CIDG makalihis na maresibe an impormasyon mapadapit sa lokasyon suboot ni Ang.
Alagad sinabi niya na nakatakas suboot si Ang bago pa mag-abot sa lugar an mga otoridad.
Diit pa suboot na maabutan asin madakop si Ang huli ta nahiling pa sa lugar an mga pagkakan kaini.
Marurumduman na nahahampang si Ang sa kasong multiple counts kan kidnapping with homicide asin kidnapping and serious illegal detention katakod sa kaso kan mga nawawarang sabungero.
Nagpaluwas man nin red notice an Interpol laban kay Ang poon kan Abril, na nangangahulugan nin kahagadan sa mga law enforcement agencies sa manlain-lain na lugar sa nacion, na arestuhon asin hanapon si Ang.
Nakalatag man an P20 million na pabuya para sa sisay man na makapagtatao nin impormasyon o makakaturo kan saiyang lokasyon.
Padagos man an pigsasagibong manhunt operation kan mga otoridad laban sa puganteng negosyante.
