LEGAZPI CITY-Pigbubusol kan House Committee on Agriculture and Food an paglangkaw kan budget kan Department of Agriculture (DA).
An lakdang na ini bilang kasimbagan sa huma kan nagpapadagos na El Niño phenomenon asin iba pang angat na inaatubang kan sektor.
Pinag-oolayan naman ini sa Budget and Review Subcommittee kan Mababang Kapulungan.
Kinokonsiderar man kan inisyatiba an padagos na paglangkaw kan presyo kan petrolyo, huli ta an gasolina sarong mayor na gastos sa operasyon kan mga paraoma asin parasira.
Manungod sa food security, sinabi ni Committee Chairperson Rep. Mark Enverga na naka-standby na an National Rice Program kan gobierno.
Katuyuhan kan programa na suportaran an mga apektadong namamanwaan asin masierto an magkakanigong supply nin pagkakan para sa nacion.
Kabali man sa mga lakdang an pagsierto kan padagos na pagdistribwir nin ayuda sa abono sa mga paraoma.
Importante ini para sa sektor na makabawi sa mga paglugi kan pananom asin mapakusog giraray an lebel kan produksyon.
