LEGAZPI CITY — Sa aga na an deadline kan Office of the Civil Defense (OCD) Bicol sa mga local government units (LGUs) sa pagconsolidate kan mga risk assessment asin iba pang datos sa paghahanda kan lahar contingency plan sa Mayon volcano.
Katakod ini kan duwang bulan nang peligro na dara kan pagputok kan bulkan asin natipon na lahar deposits na pwedesir na ibaba sa panahon kan tag-uran.
Sa intrevista kan Bombo Radyo kay Legazpi City Disaster Risk Reduction and Management Office head Engr. Miladee Azur, preparado asin existing na an contingency plan kan syudad alagad nagkapirang parte suboot kaini an na-update basado sa mapa na ipinaluwas kan Philippine Institute of Volcanology and Seismology (PHIVOLCS).
Nakalaag kaya sa nasambitan na mapa na posibleng umabot hasta sa urban barangays kan syudad siring kan Brgy. Arimbay asin Rawis an lahar flow na maagi sa Yawa River o sakop an gabos na mga barangay na apektado kan Mayon eruption kun maabot an worst-case scenario.
Segun man sa datos kan Albay Public Safety and Emergency Management Office (APSEMO), pwedesir na ibaba an lahar sa rainfall threshold nin sarong oras na padagos an pagbulos kan uran na maabot sa 25mm-40mm.
Nakatalaan man na iebakwar an mga maaapektaran na residente hali sa northern barangays pasiring sa southern barangays kan syudad enkaso maobserbaran an lahar flow.
