LEGAZPI CITY – Ipighahanda na an kasong isasangat kontra sa sarong city councilor makalihis madiskubre kan Albay Power and Energy Corporation (APEC) na nagsagibo nin illegal direct tapping sa kuryente sa ciudad kan Tabaco.
Sa intrevista kan Bombo Radyo Legazpi ki APEC spokesperson Pat Gutierrez, patong-patong na kaso an posibleng kahampangon kan nasabing konsehal.
Enot digdi napag-araman na igwa ining haluyun ng arrears na dae pigbabayadan hasta sa putulan na nin suplay kan kuryente.
Tinawanan man suboot nin humanitarian consideration an nasabing opisyal partikular na ngonyan na may pandemya alagad ipinasipara sana.
Alagad kan magsagibo nin operasyon an APEC, digdi nadiskubre na nagsagibo nin illegal tapping sa kuryente an konsehal.
Pinahimutikan man ni Gutierrez an mga akusasyon sa korporasyon na igwang pigpapaboran na mga personalidad sa pagkondukta nin massive disconnection.
Saro suboot na patunay an ginibong aksyon kontra sa konsehal na patas an pigigibong lakdang kan opisina.
Sa presente, dae naman nagtao pa nin dugang na mga detalyes si Gutierrez dapit sa opisyal huli ta padagos pa an ipigsasagibong imbestigasyon.
