LEGAZPI CITY-Kapot na kan pamilya ni dating Department of Public Works and Highways (DPWH) Undersecretary Maria Catalina Cabral an saiyang cellphone, sa katahawan kan direktiba kan Office of the Ombudsman na ini isairarom sa kustodiya kan mga awtoridad sa Benguet.
Kinumpirma ni Police Col. Lambert Suerte, hepe kan Benguet Police Provincial Office, na dai nakuwa kan saindang mga tawohan an nasabing gadget hale sa pamilya kan namaaram na opisyal.
Si Cabral an nadukayang warang buhay makalihis na mahulog sa bangin sa Kennon Road, Tuba, Benguet.
Bago an saiyang pagkagadan, pigiimbestigaran siya kasunod kan suboot iregularidad sa nagkapirang flood control projects kan Department of Public Works and Highways.
An Ombudsman pigsugo na an cellphone asin iba pang gadgets ni Cabral dapat ingatan bilang posibleng ebidensya sa mga kasong pigiimbestigaran.
Sa ngonian, nagtetenir suboot an kahapotan kun pano masisierto kan mga imbestigador an integridad kan mga datos sa gadget na kapot mismo kan pamilya.
Nagbukas man ini nin mahiwasang diskusyon mapadapit sa chain of custody kan ebidensya sa mga kasong may kinaaraman sa mga opisyal kan gobierno.
