LEGAZPI CITY- Nagpapamati suboot sa mga parientes kaini an saro sa mg biktima sa nangyaring landslide sa banwaan kan Tiwi sa Albay na nawawara pa hasta sa ngonian makalihis an nakaaging raot nin panahon.
Sa intrevista kan Bombo Radyo Legazpi ki Mayor Jaime Villanueva, pinag-iisipan pa kun ipagpapadagos an ipigsasagibong retrieval operation para sa tulong katawo na natabunan kan daga sa nasabing banwaan.
Segun ki Villanueva, saro suboot sa mga tugang kan nawawarang biktima ang nagdulok sainda asin apelar na ipundo na an nasabing operasyon.
Istorya pa kan dae na pinangaranang pariente na nagpapamati an saro sa mga pighahanap tangarig na ihayag na dae na pag-istorbohon huli ta nasa irarom na parte siya kan lugar.
Sa presente, pighahalat pa kan alkalde an magigin desisyon kan iba pang parientes kan mga biktima sa landslide kun idadagos pa an retrieval operation o dae na.
Sa presente, nagbabadol na man sa labi 21 an casualty sa Albay makalihis an matinding pag-uran na ibinagsak sa kasagsagan kan bagyong Usman.
