LEGAZPI CITY—Padagos na makakaeksperyensya nin mga pag-uuran an rehiyon kan Bicol huli sa epekto kan pigbabantayang low pressuare area asin habagat.
Segun ki Weather Specialist Christian Alen Torevillas, sa intrevista kan Bombo Radyo Legazpi, basado sa weather advisory na ipinaluwas kan state weather bureau makakaeksperyensya nin nasa 50-100 millimeters na mga pag-uuran an Bicol puon sa aldaw nin Martes, Agosto 26, sagkod Miyerkules nin hapon, Agosto 27.
Alagad segun saiya pag-abot nin hapon na Miyerkules asin Huwebes posibleng mabawasan na an mga pag-uuran sa rehiyon.
Huli digdi, posibleng magkaigwa nin localized flooding partikular na sa mga low-lying areas o harani sa mga salog siring man an landslides.
Dugang kan opisyal na an tracking kan low pressure area an pasiring sa Samar o sa eastern coast kan Bicol, alagad tinawan-duon niya na hibaba an tsansa kaini na magin bagyo.
En kaso man na magin ganap na bagyo an nasabing raot na panahon, aapudon ini sa local name na “Jacinto” asin pansampulong bagyo ngunyan na taon.
Mientrastanto, abiso ni Torevillas sa publiko na padagos na mag-antabay sa updates mapadapit sa presenteng kamugtakan kan panahon sa nacion siring kan pagbisita sa website kan PAGASA asin social media accounts.
