LEGAZPI CITY-Liwat na nagpapagirumdom ang Bureau of Fire Protection Aroroy sa Masbate ngani maibitaran an anumang insidente huli sa paggamit nin mga paputok asin iba pang mga pailaw ngonian na holiday season.
Segun kay Aroroy Fire Station Officer-in-Charge Senior Fire Officer 1 Alvin M Dela Peña, sa intrevista kan Bombo Radyo Legazpi, na dati nang may direktiba na nagpoon mismo sa saindang banwaan manungod sa pagiwas sa paggamit nin mga paputok.
Inapod suboot ining “Project Patuligwang” o Pagkain, at Tumutok sa pata sa Ligtas na Pagdiriwang na enkaso igwang madakop na naggagamit nin mga paputok, an sasalidahan ini nin mga pagkakan.
Pigtututukan kan direktiba an mga joven, kun sain basado sa datos kan Department of Health (DOH), kadakol sa sainda an nagagamit kaini tuyong holiday season.
Parte man suboot kan direktiba kan DOH an pigaapod na “APIR” o Aksyon Paputok, Injury Reduction ngani maibitaran an mga fire related injuries.
Dugang pa ni Peña na pigpapadagos ninda ini hasta sa ngonian ngani masuportaran an mga siring kaining kampanya.
Marurumduman na kan taong 2023-2024, an nairehistrong warang firecraker injury sa banwaan kan Aroroy sa Masbate.
Pagirumdom liwat kan opisyal sa publiko na sa ngonian an kadakol na mga dekorasyon, ibitaran an overloading asin kun mabakal nin mga Christmas Lights, siertuhon na igwa ining mga Import Commodity Clearance (ICC) marks.
Dagdag pa kan opisyal na dai pagbayaan na nakasindin nin haloy an mga pailaw asin aramon man an mg agaihan paluwas kan harong asin komunidad enkaso magkaigwa nin mga insidente ning kasulo.
