LEGAZPI CITY-Kinumpirma ni Department of Health (DOH) Spokesperson Undersecretary Albert Domingo na nakalunad an 38 Pilipinong crew members sa MV Hondius kun sain nairehistro an Hantavirus outbreak.
An nasabing cruise ship presenteng nakadaog sa Cabo Verde sa Atlantic Ocean kun sain pinagtutubudan na tulo katawo an gadan huli sa hantavirus.
Segun kay Undersecretary Domingo, nasa labi 100 na pasahero asin crew members an lunad kan nabanggit na cruise ship, kabale digdi an 38 mga Pilipino.
Alagad, nilinaw niya na warang helang an mga nakalunad digdi na Filipino crew members, susog sa World Health Organization (WHO) asin International Health Regulations.
Pigbabantayan na man kan ahensya an pagpapauli sa mga Pilipino digdi huli ta nakasalalay an repatriation sa operator kan nasabing cruise ship.
Paliwanag pa niya na an hantavirus, bako na bago asin sarong bibihirang helang na nakukuwa sa ihi o dumi kan mga kino na infected kan virus.
Wara pa man suboot nin nairerehistrong kaso kan hantavirus ngonian sa nacion.
Afuera kan mga nairehistro kan taong 1992 na padagos pang pigbeberipika kun kapareho ini kan naunambitang virus.
An sintomas kaini, iyo an mala-trangkasong helang arog kan pangungulog kan payo asin lawas, na haros kan kapareho kan leptospirosis asin dengue.
Nilinaw man ni Undersecretary Domingo na harayo an lugar kun sain nairehistro an kaso kan hantavirus asin presenteng nasa irarom sa quarantine an barko.
Pigsierto man kan ahensya na nakabantay sinda sa sitwasyon katuwang an Bureau of Quarantine, asin nagpatanid sa publiko na dai mahadit sa nasabing helang.
