Binawian na nin buhay si Felicien Kabuga, saro sa mga pangenot na suspek sa 1994 Rwandan genocide, mantang nahahampang sa paglilitis sa International Criminal Court (ICC) sa The Hague, segun sa United Nations.
Kinumpirmar kan International Residual Mechanism for Criminal Tribunals na nagadan si Kabuga sa sarong ospital kan Sabado, Mayo 16, sa edad na 90-anyos.
Haloy ng pigkokunsiderar si Kabuga bilang saro sa most wanted fugitives sa bilog na kinaban huli sa suboot papel kaini sa pagpopondo asin pagsuporta sa genocide sa Rwanda kan 1994, kun sain pigkakarkulong nasa 800,000 katawo an nagadan sa laog sana nin nagkapirang bulan.
Inakusaran si Kabuga bilang saro sa mga nasa likod kan Radio-Television Libre des Mille Collines o RTLM, sarong istasyo kan radyo na suboot nag-udyok sa mga ethnic Hutu na gadanon an mga Tutsi sa kasagsagan kan genocide.
Afuera digdi, pinagtutubudan na nagbarewas man siya nin mga machete asin nagsuporta sa mga grupong imbwelto sa mahewasan na panggagadan.
Kan 2020, naarestar si Kabuga sa Paris makalihis an haros tulong dekadang pagtatago gamit an manlain lain na pekeng pagkakabisto asin pasaporte.
Makalihis maarestar, ipiglipat siya sa The Hague kun sain niya pigkakahampang an mga kasong genocide, conspiracy to commit genocide, incitement to genocide, asin crimes against humanity kaibanan an murder asin extermination.
Maduon man na pinahimutikan ni Kabuga an gabos na akusasyon asin nagsunad nin not guilty plea sa korte.
Kan 2023, ipinapundo kan mga hukom an paglilitis makalihis ideklarar na bako siya physically asin mentally fit na maghampang sa korte.
