LEGAZPI CITY-Nanindugan an kampo ni Sen. Bato Dela Rosa na pigpoprotehiran sana suboot kan mambabatas an saiyang direchos, kaya dae siya nagpapahiling sa publiko o epektibong nagtatago.
Piglinaw ini kan abogado kan senador na si Atty. Israelito Torreon, kan hinapot siya manungod sa kun pano pinakamarahay na iladawan an presenteng kamugtakan ni Dela Rosa.
Padagos niyang pigkwestyon an P50-milyon na bounty na itinao sa mambabatas, siring man an saiyang klasipikasyon bilang ‘armed and dangerous’ na suboot sinasabing katumbas kan ‘shoot to kill order’.
Huli kaini, inangyat kan abogado an mga nagmamawot na panimbagon si Sen. Bato na darahon an bagay na ini sa sarong lokal na korte, huli ta pignotar kaini na may ‘justice system’ man sana an satuyang nacion.
Sa ibong kan pag-expire kan “ultimatum” kan Philippine National Police asin an pagbugtak nin bounty sa senador, dai pa man giraray nadadakop an senador.
Si Sen. Bato Dela Rosa kabali sa mga pinangaranan na co-perpetrator ni dating Presidente Rodrigo Roa Duterte sa sarong kasong may kinaaraman sa ‘crimes against humanity’ sa International Criminal Court (ICC), katakod kan implementasyon kan madugong “war on drugs.”
