Naglunsar nin meeting an mga miyembro kan Association of Southeast Asian Nations kaiba an China ngani na madiskutir an lalong naglalalang tensyon sa West Philippine Sea.
Isinagibo an meeting sa Vientiane na kapitolyo kan Laos.
Si Chinese Foreign Minister Wang Yi an nagrepresenta sa China sa meeting na inatindiran kan mga representante kan Pilipinas, Indonesia, Thailand, Singapore, Vietnam, Malaysia, Myanmar, Cambodia, Brunei asin Laos.
Malinaw sa naging diskusyon an pangapudan kan ASEAN na ibitaran an pagpapalala kan tensyon asin maging bukas sa dayalogo nganing maibitaran an gera.
Mahigot man an naging pangapudan ni Indonesian Foreign Minister Retno Marsudi na dae magpa-impluwensya sa ibang mayayaman na nasyun na posibleng piggagamit sana an mga miyembro kan economic bloc ngani na maibusol an saindang pansadiring interes.
Nagkasararo man an delegado na magbilog nin code of conduct sa pinag-aagawang kadagatan ngani na maibitaran an tensyon.
Magigirumduman na haloy ng pigrereklamo kan ASEAN members na Pilipinas, Vietnam, Malaysia asin Brunei an pang-aagaw kan China sa mga teritoryo na laog pa sa saindang exclusive economic zone.
