LEGAZPI CITY-Nag-abot na sa Cebu an gabos na lideres asin kinatawan kan Southeast Asia para sa ASEAN Summit 2026, kun saen enot na nag-abot si Brunei Sultan Hassanal Bolkiah, lunad kan sadiri niyang eroplano asin siya mismo an nagpalupad.
Kaiba kan Sultan kan Brunei an saiyang aki na si Prince Abdul Mateen kan maglapag sa Mactan-Benito Ebuen Air Base kan Miyerkules nin banggi.
Sinabat sinda kan pirang opisyales kan gobierno kaiba sina Social Welfare Secretary Rex Gatchalian asin mga lokal na opisyal kan Cebu asin Lapu-Lapu City.
Obheto kan ASEAN Summit na pag-olayan an mga kinahahampang kan rehiyon huli sa epekto kan naglalangkaw na presyo kan langis dara kan tensyon sa Gitnang Silangan.
Segun kay President Ferdinand Marcos Jr., prayoridad kan Pilipinas bilang ASEAN chair an energy security, food security, asin kaligtasan kan mga namamanwaan kan ASEAN sa manlain-lain na parte kan kinaban.
Sa sidelines kan summit, nangapudan an Presidente sa mga miembro kan Brunei Darussalam–Indonesia–Malaysia–Philippines East ASEAN Growth Area (BIMP-EAGA) na gibuhong konkretong aksyon an mga plano para sa mas makusog asin mauswag na kooperasyon kan mga rehiyon.
Nagkaigwa man nin bilateral meeting an Pilipinas asin Vietnam kun saen napagkasunduan kan duwang nacion na magbilog nin long-term rice trade mechanism ngani masierto an bastanteng suplay kan bagas asin mapakusog an kooperasyon sa food security.
