LEGAZPI CITY- Positibo an paghiling kan sarong Political analyst sa nagin dalagan kan hosting kan Pilipinas sa ASEAN summit.
Segun ki Prof. Amr Solon Sison sa intrevista kan Bombo Radyo Legazpi na haros nakuwa man kan nacion an mga mawot kaini, kaibanan na an progreso sa dayalogo para sa Code of Conduct sa West Philippine Sea na nasa labi sa 80% na.
Marurumduman na enot na sinabi ni Presidente Ferdinand Marcos Jr. na an Definition of terms asin paragraphs na sana an saindang tatawan linaw.
Sa presente na naipasara na sa Singapore an hosting kan ASEAN summit para sa 2027, naglalaom si Solon na mas mapapakarahay pa an mga lakdang para sa nasabing Code of Conduct.
Paliwanag kaini na sa international relations, mas magayon na an mas poderosong nacion an namamayo sa pagibo nin kasunduan huli sa mas dakula an kakayanan kaini sa nagkapirang aspeto.
Dagdag pa kaini na an Singapore an igwang advantage huli ta pinaglalaoman na magiging patas ini huli ta bako claimnant kan West Philippine Sea, bako siring kan Pilipinas.
Sa paagi kan nasabing Code of Conduct, pinaglalaoman na magkakaigwa nin sarong international law na susunudon sa mga orolay sa West Philippine Sea.










