LEGAZPI CITY-Pinatanidan kan China an Estados Unidos, Japan asin Pilipinas mapadapit sa pagpoon kan taunang joint military exercises kan tulong nabanggit na nacion.
Sa sarong press conference, sinabi Chinese Foreign Ministry spokesman Guo Jiakun na an pagkasararo kan mga nacion sa ngaran nin seguridad, pwedisir na magkaigwa nin negatibong mga resulta sa saindang mga sadiri.
Mientrastanto, kasabay kan opisyal na pagbukas kan ika-41 na edisyon kan Balikatan exercises kasuodma, tinawan duon ni AFP General Romeo Brawner Jr. an importansya kan aktibidad sa pagpapakusog kan kolektibong depensa asin estabilidad sa rehiyon.
Susog sa AFP Chief, an Balikatan exercises nagpapahiling nin pagigin andam, aktibong kooperasyon, asin pagmantenir kan katoninongan sa paagi nin kusog, siring man an determinasyon kan mga kaalyado na magtarabangan asin maghiro nin igwang pagkakasararo.
An Balikatan exercises ngonian na taon kasabay man kan ika-75 anibersaryo kan Mutual Defense Treaty kan Pilipinas asin Estados Unidos, na orog na nagpapakusog kan alyansa asin misyon kan duwang nacion para sa sarong talingkas asin bukas na rehisyon sa Indo-Pasipiko.
