LEGAZPI CITY – Preparado na an grupo nin mga paratukdo sa gigibuhong hiro protesta sa Setyembre 21 na isasabay sa anibersaryo kan deklarasyon kan Martial Law.
Segun ki Alliance of Concerned Teachers Chairperson Vladimir Quetua sa intrevista kan Bombo Radyo Legazpi na dae ninda mapupugulan an kagustuhan kan mga estudyante na magbale sa gigibuhong mahiwasang protesta nganing kondenahon asin kalampagon an gobierno sa mga nangyayaring korapsyon sa saindang mga proyekto.
Afuera sa korapsyon an ipapangapodan ninda an paghalangkaw kan saindang mga sahod sa ibong kan pagpapasasa kan ibang opisyal kan gobierno sa mga kwartang ipighahabon sa mga namamanwaan.
Punto niya man na nasasabotan na ngonian kan ordinaryong Pilipino an mga pigkokondusir na mga hiro protesta sa pagkakasararo laban sa korapsyon.
Pigtaram pa kan opisyal na piglalaoman ninda na lagpas 5,000 katawo na mga paratukdo sa National Capital Region sana an posibleng makisumaro sa mangyayaring protesta nganing iluwas an saindang dagit asin agrangay asin dae pa kasabay an mga estudyanteng makikisumaro.
Dapat man suboot na dae pagsawayon kan mga pulis an mga ralihista kun talagang pigsusunod ninda an direktiba ni Presidente Ferdinand Marcos Jr. na dagit sa korapsyon.
Sa presente an pigbibilog na ninda an mga grupo na nakatoka sa paglinig, pagtao nin asistensya medikal, asin iba pa nganing mamantenir an pazy orden sa enterong durasyon kan hiro protesta.
Nangapodan man si Quetua na iselebrar an world teachers month sa paagi kan pagbale sa mga paghiro laban sa korapsyon nganing maguno an paghalangkaw kan sahod asin disenteng pagtatrabaho sa sektor kan edulasyon.
