LEGAZPI CITY — Preparado asin nakaalerto an Albay Provincial Disaster Risk Reduction and Management Council sa epekto kan bagyong Basyang sa nag-aalburotong bulkang Mayon.
Ipigbuyagyag ni PAGASA weather forecaster Melvin Almojuela na madara nin moderato hasta makusog na pag-uran an nasambitan na raot kan panahon na ikinahahandala mapababa kan natipon na volcanic materials sa sarong bulan nang aktibidad kan Mayon volcano.
Segun ki Philippine Institute of Volcanology and Seismology (PHIVOLCS) resident volcanologist Ed Laguerta, uminabot na sa 15.5 million cubic meters an nailuwas na pyroclastic materials hali sa lava fountaining, lava collapse, rockfalls asin lava flow.
An nasambitan na materials an nag-aambag sa bagong lahar deposits apwera pa sa mga lumang deposits sa mga nakalihis na pag-aalburuto kaini.
Pinaka-pigbabantayan ngunyan an makusog na bulos na uran o torrential rains siring man an pagka-saturate kan daga.
Mientras tanto, enot nang nag-abiso an PAGASA sa posibilidad kan paglangkaw kan lebel kan tubig sa mga river systems kan Bicol region kaya pigpapalikay an mga residente na nagtetenir harani sa mga bulod asin sa low lying areas huli sa posibleng pagbaha.
