LEGAZPI CITY – Preparado nang magsirbi si Albay Governor Noel Rosal enkaso siya an mapili ni Presidente Ferdinand Marcos Jr. komo magin Chairman kan Regional Development Council.
Segun saiya sa intrevista kan Bombo Radyo Legazpi na aram niyang papakusugon liwat kan Presidente an Regional Development Investment Plan nganing dae na mautro an mga nangyaring katiwalian sa gobierno.
Pagdoon niya man na dati na niyang nakaputan an naunambitang konseho asin enkaso suboot na siya an mapili liwat, ma-krear siya nin mga bagong proyekto asin malatag nin Regional Development Investment Plan na mapopondohan nganing mapapa-uswag an mga saradit na provincia sa rehiyon.
Ikina-ugma niya man an pagsuporta saiya ni Former Vice President asin presenteng Naga City Mayor Leni Robredo sa saiyang nominasyon huli ta maikokonsidera niyang nahiling kan alkalde na malinig an saiyang track record.
Pigtaram pa kan Gobernador na kaipuhan nang makapili dapat an Presidente nganing tulos na makapagtrabaho sa paglalatag kan Regional Development Investment Plan enkaso hagadon na ini sainda.
Wara man siyang masabi sa kapwa niya nominado sa posisyon na si Camarines Sur Governor L-ray Villafuerte huli ta nagsirbi na man ini bilang chairman Regional Development Council asin nahiling man kun pano nag-uswag an saiyang provincia sa irarom kan saiyang liderato.
Paglinaw niya man na kun siisay man an mapili sa saindang duwa na dapat maipagpadagos an mga programang pigsasagibo kan mga nasa baba urog na an mga Local Government Units.
Nagpasalamat man si Governor Rosal sa mga nag-nominate saiya asin nagpahayag nin suporta sa pagigin Chairman asin nagpromesa na gigibuhon niya gabos nganing matawan gabos nin oportunidad an gabos na provincia sa rehiyon urog na sa mga programa asin proyekto na mawot nindang ipa-otob sa saindang nasasakupan.
