LEGAZPI CITY-Nagluwas sa Board of Investments (BOI) records na an Cale88 Foods Corp., na warang mga empleyado sa taong 2024 asin nasa duwang empleyado sana pag-abot kan taong 2025.
An naunambitang korporasyon, sarong banana chips exporter na co-founder an agom ni Bise Presidente Sara Duterte, asin iprinesentar ini sa impeachment trial kontra kay Duterte kan Biyernes, Nobyembre 20.
Pigkumpirma naman ini ni Department of Trade and Industry (DTI) Undersecretary Ceferino Rodolfo, na nagserbing vice chairman asin managing head kan BOI, durante kan cross-examination ni House prosecution counsel Erwin Matib.
Pigsugo kaya ni Senate impeachment court presiding officer Francis Escudero si Matib na ipahiling an General Information Sheets (GIS) kan Cale88 para sa taong 2024 asin 2025 General Information Sheets (GIS), na pigsangat sa Securities and Exchange Commission (SEC).
Tulos man na narisa ini ni Rodolfo asin sinabing pamilyar siya sa mga dokumento.
Sinabi pa kaini na igwang kopya an BOI kan mga GIS huli ta sarong rehistradong negosyo ini asin kaipuhan magsumiter nin mga dokumento sa ahensya.
Mientras tanto, naenot nang nireport kan Anti-Money Laundering Council (AMLC) na nakapag-record an Cale88 nin haros P1 billion sales sa sarong punto kaini.
Narisa man kan AMLC na igwang naresibeng P776 million sa foreign remittances an kumpanya para sa taong 2022 hasta 2025, kabale an P319 million gikan sa China.











