Naghagad an kampo ni Vice President Sara Duterte sa impeachment court na magpaluwas nin subpoena para sa apat na indibidwal na mawot nindang ihampang bilang mga masunod na testigo sa pagpadagos kan paglilitis sa Nobyembre 19 asin 20.
Segun ki House prosecution panel member asin Manila Representative Joel Chua, apat na indibidwal an tinukoy kan depensa sa saindang kahagadan, alagad dai na siya nagtao nin dugang na detalye.
Kabali sa mga mawot ipaapod si Atty. Rainer Dela Fuente kan AML Consulting PH na magpapaliwanag sa mga probisyon kan Anti-Money Laundering Act (AML).
Kabali man si Department of Trade and Industry (DTI) Undersecretary Ceferino Rodolfo, Food and Drug Administration (FDA0 Director Pilar Marilyn Pagayunan, asin sarong representante kan Center for International Expositions and Missions (CITEM).
Lalaoman na tatalakayon kan mga testigo hali sa DTI, FDA, asin CITEM an pagpaparehistro kan Cale88 Foods Corporation, kabali an mga produkto kaini na banana chips asin mga transaksiyon asin komunikasyon kan kumpanya.
Naenot nang ipinaaram kan defense panel sa impeachment court na igwa pa sindang walo hasta sampulong testigo na ihahampang sa paglilitis.
Sa irarom kan mga patakaran kan impeachment court, kaipuhan isumite kan prosecution asin defense panels an pangaran kan saindang mga testigo limang aldaw antes an paglilitis kun dai pa kabali an mga ini sa pre-trial order.
Si Duterte an nahahampang sa impeachment manungod sa alegasyon kan pagkakaigwa nin dai maipaliwanag na yaman.











