Pighayag kan Bureau of Internal Revenue (BIR) na tinugutan kaini an pagsasagibo nin tax audit sa siyam na negosyo na pigkokonekar ki Vice President Sara Duterte asin agom na si Atty. Manases Carpio.
Nagpaluwas an ahensya nin mga Letter of Authority (LOA) makalihis makahiling nin bastanteng basehan ngani na magkondusir nin pormal na imbestigasyon, kaibanan an paghiling sa book of accounts asin iba pang financial records kan mga kumpanya.
An mga negosyong subject sa tax audit iyo an Carpio Lawyers (Formerly Carpio & Duterte Lawyers), Zelta Matiem Salon, City Hall King Chow Foods Corporation, Davao Bounty Times Foods Corporation, Madayaw Fisheries Inc., Davao Emerging Taipans Corporation, Amianan Shores, Inc., Cale88 Foods Corporation asin Geometry Security and Investigation Agency, Inc.
Ipinaliwanag ni BIR Commissioner Charlito Mendoza na an LOA an dae nangangahulugan na igwang paninimbagan an mga imbwelto, kundi sarong legal na lakdang ngani na mahiling an tamang buwis na dapat bayadan.
Dagdag pa kaini na obligasyon kan ahensya na magkondusir nin imbestigasyon kun igwang nahiling na basehan, asin kun mapapatunayan na igwang pagbayolar, posible ining magresulta sa kasong sibil, administratibo, o kriminal.
Sinabi man kan BIR na an lakdang an basado sa third-party information, kaibanan an mga datos hali sa pampublikong rekord, report kan Office of the Ombudsman, asin impormasyon hali sa Anti-Money Laundering Council na nagluwas sa pagdangog kan impeachment kan Kamara.
