LEGAZPI CITY-Tinugutan kan Senate impeachment court si Anti-Money Laundering Council (AMLC) Secretariat Executive Director Ronel Buenaventura na magtestigo bilang prosecution witness sa impeachment case laban ki Vice President Sara Duterte.
Pinahimutikan kan korte an mosyon kan depensa na ibali si Buenaventura bilang testigo.
Sinabi ni Presiding Officer Francis “Chiz” Escudero na an mga rekord kan AMLC bakong lubos na protektado sa mga subpoena.
Segun sa piskalya, posibleng magpresentar si Buenaventura nin records kan mga transaksyon na nagkakantidad nin P4.4 billion na suboot imbuelto si Duterte asin an saiyang agom na si Manases Carpio poon 2007 hasta 2025.
Kabale digdi an suboot P41-milyon na cash withdrawal ni Carpio kan Agosto 6, 2024; sarong P319-milyon na remittance hale sa China pasiring sa CALE88 Foods Corporation; asin mga tseke na nagkakantidad nin P14.88 milyon na suboot nginaranan si Duterte bilang benepisyaryo.
Idinoon ni Escudero na an testimonya ni Buenaventura limitado sana sa mga may kinaaraman na bagay asin pwedisir gibohon sa “in camera” kun kinakaipuhan.
Mientras tanto an depensa igwa nin derichos na magkontra sa mga ebidensya na iprinesentar.
