Vice President Sara Duterte

Liwat na magpapadagos ngunyan na Huwebes, Nobyembre 19, an impeachment trial ni Vice President Sara Duterte sa Senado, makalihis an nagkapirang aldaw na suspensyon kan pagdangog huli sa pagsasagibo kan 49th Association of Southeast Asian Nations o ASEAN Summit sa nacion.

Pinaglalaoman na mapresentar nin apat na testigo an defense team ni Duterte ngunyan na aldaw asin sa Biyernes, Nobyembre 20, bilang parte kan pagpapadagos kan saindang presentasyon kan ebidensya kontra sa natatadang Article II of impeachment complaint.

Kaibanan sa mga pinaglalaoman na mahampang sa impeachment court si Atty. Rainer Dela Fuente kan AML Consulting Philippines, na matukar sa mga probisyon kan Anti-Money Laundering Act o AMLA.

Mahampang man si Department of Trade and Industry Undersecretary for Industry Development and Investment Promotions Group Ceferino Rodolfo ngani na magtaong linaw sa pagpaparehistro kan Cale88 Foods Corporation sa Board of Investments.

Pinaglalaoman man na tutukaron ni Food and Drug Administration Director IV Pilar Marilyn Pagayunan an pagpaparehistro kan produkto kan Cale88 na sweetened banana chips.

Mientras tanto, pinaglalaoman man na magtatao nin testimonya si Rowena Mendoza, general manager kan Center for International Expositions and Missions o CITEM, o kaya an representante kaini dapit sa mga komunikasyon asin paanyaya sa Cale88 ngani na magpartisipar sa mga food exposition.

Segun man ki Senate impeachment court spokesman na si Atty. Reginald Tongol, sakop kan mga testimonya kan apat na testigo an mga alegasyon sa irarom kan Article II.

Marurumduman na nakatuon an nasabing artikulo sa suboot dae maipaliwanag na yaman, bako kumpletong deklarasyon kan mga ari-arian sa Statement of Assets, Liabilities and Net Worth (SALN) asin suboot ipinagbabawal na interes sa negosyo kan bise presidente.

Enot na inihayag kan depensa na plano kaini na maghampang pa nin walo hasta sampulong testigo sa mga masunod na pagdangog.