LEGAZPI CITY-Nagsangat an PDP-Laban nin open letter sa Korte Suprema, na naghahagad na resolberan na an mga nakabinbing petisyon katakod kan mga warrant of arrest laban kina dating Presidente Rodrigo Duterte asin Senador Ronald “Bato” Dela Rosa sa saindang mga kasong igwang kinaaraman sa International Criminal Court o ICC.
Susog kay PDP-Laban spokesperson Atty. Ferdinand Topacio, mawot sana nindang maipaabot an posisyon kan partido asin ma-enganyar an mga mahistrado na magpaluwas na nin desisyon.
Sinabi man kan partido na haros 600 aldaw nang nakabinbin an habeas corpus petition para kay Duterte, mantang pighahagad man an tulos na pagresolba sa motion for reconsideration ni Dela Rosa.
Kasabay kaini, nagsagibo na nin protesta an mga miyembro kan PDP-Laban asin mga tagasuporta ni Duterte sa hampang kan Korte Suprema sa Maynila.
Nangapudan sinda kan desisyon mapadapit sa legalidad kan mandamiento na ipinaluwas kan ICC.
Inaresto si Duterte kan Marso 11, 2025 asin idinara sa The Hague ngani hampangon an kasong crimes against humanity katakod kan war on drugs.
Nakatalaang magpoon man an paglilitis ni Duterte sa Nobyembre 30, 2026.
Mientras tanto, padagos man na pinaghahanap kan ICC si Dela Rosa, na dae pa nagpapahiling sa publiko hasta sa presente.
