LEGAZPI CITY-Nagsagibo an Estados Unidos nin limitadong mga pag’atake sa Qeshm Island kan Iran sa Strait of Hormuz, bilang simbag sa pagpaputok kan Islamic Revolutionary Guard Corps (IRGC) sa sarong eroplanong militar kan Estados Unidos.
Susog sa Iranian state news agency na nairehistro an nagkapirang serye nin pagsabog sa nasabing isla kan Lunes , sa tahaw kan padagos na tensyon sa rehiyon.
An insidente nangyari antes an midterm election sa Estados Unidos, sa tahaw kan pagbaba kan suporta kay U.S. President Donald Trump asin nangangapudan an saiyang sadiring partido para sa pagtapos kan gera na nagpoon kan Pebrero.
Sinabi ni Trump na dai siya naghihidali na dagdagan an mga pag’atake laban sa Iran, na nagsasabi na an Estados Unidos nakabaldado na sa ekonomiya kan nacion.
Alagad, nasambit kan presidente na an Estados Unidos pwedisir magpuntirya sa “Pickaxe”—sarong pasilidad na konektado sa nuclear programme kan Iran—na posibleng matapos sa laog sana nin sarong oras.
Mientrastanto, an Iranian Foreign Minister Abbas Araghchi nagsabi na an mga mahigot na negosasyon ginigibo ngonian sa tabang kan mga tagapag-ultanan, alagad an Tehran nagtetenir na andam para sa parehong diplomatiko asin militar na mga senaryo.
