LEGAZPI CITY-Nagmamawot an Pilipinas asin Japan na orog pang mapakusog an saindang kooperasyon sa depensa asin seguridad sa Timog-Silangang Asya nganing masimbagan an mga kalamidad, tensyon sa kadagatan, asin nagbabagong security dynamics sa Indo-Pacific region.
Ipinahayag ini ni Philippine Defense Secretary Gilberto C. Teodoro Jr. asin Japanese Defense Minister Koizumi Shinjiro sa “ASEAN Plus One Defense Ministers’ Informal Meeting with Japan” na pinangenotan kan nacion.
Susog ki Teodoro, importante an papel kan Japan bilang sarong haloy nang kasosyo kan ASEAN, orog na sa paghanap nin kolektibong aksyon sa atubangan kan mga angat sa East China Sea asin iba pang parte kan kadagatan na nakakaapektar sa bilog na rehiyon.
Nagpahayag man an kalihim nin pasasalamat sa padagos na suporta kan gobyerno kan Japan para sa sentralidad kan ASEAN asin sa mga inisyatiba na nagpapakusog kan mga kakayahan sa depensa asin seguridad sa kadagatan kan mga miyembrong nacion.
Pigtawan duon man sa pagtiripon an presenteng kooperasyon sa pag-ultanan kan duwang nacion bilang mga co-chair kan “ASEAN Defense Ministers’ Meeting-Plus Working Group on Maritime Security” para sa mga taon 2024 sagkod 2027.
Inasegurar kan duwang lado na an magkasararong aktibidad asin an “Future Leaders Program” na padagos na mapakusog kan disaster resilience, maritime security, asin people-to-people ties sa rehiyon.
