LEGAZPI CITY-Pinahigot kan Philippine Coast Guard (PCG) an seguridad sa mga pantalan sa nacion bilang bilang preparasyon sa piglalaoman na pagdagsa kan mga biyahero ngonian na Undas 2026.
Segun ki PCG Spokesperson Commodore Noemie Cayabyab, maabot sa 17,000 na mga personahes kan ahensya an pig-deploy sa mga pantalan ngani masierto an kaligtasan kan mga biyahero.
Nasa high alert status an PCG puon Oktubre 29 hasta Nobyembre 3, kasabay kan piglalaoman na paglangkaw kan mga pasaherong mabiyahe pasiring sa mga probinsya.
Piglalaoman na mapoon nang magdakol an mga biyahero sa mga pantalan sa nacion, poon saaga, Oktubre 30.
Igwa man nin pigbugtak na mga passenger assistance desk na pwedeng dolokon kan mga biyahero na nangangaipo nin impormasyon asin enot na medikal na tabang.
Kasabay kaini, pinakusog man kan PCG an mga inspeksyon bago maghale an mga barko nganing masierto na nagsusunod ini sa mga establisadong pamantayan sa kaligtasan.
Kabale sa mga pig-iinspeksyunan iyo an tamang pagtambak kan mga kargamento nganing dae mabara an mga agihan asin emergency exit, siring man an pagigin andam kan mga kagamitan huli sa posibleng kasulo, asin iba pang emerhensya.
