Nagtao an Philippine Red Cross (PRC) nin total na P7.43 milyones na cash assistance sa 743 na pamilya na apektado kan magnitude 7.8 na linog sa Sarangani asin Davao Occidental kan Martes, Oktubre 27, 2026.
Sa pakikipagtabangan sa International Federation of Red Cross and Red Crescent Societies (IFRC), nagdistribwir an organisasyon nin Multipurpose Cash Grants komo parte kan padagos na humanitarian response kaini sa rehiyon.
Sa munisipyo kan Malapatan, Sarangani, nag-abot sa poco mas o menos 323 na pamilya an nakaresibe nin tig-P10,000 na nagkakantidad nin total na P3.23 milyones sa distribution event na ginibo sa Barangay Sapu Masla Covered Court.
Mientrastanto, nakaresibe man nin total na P4.2 million an 420 na apektadong pamilya sa munisipyo kan Jose Abad Santos, Davao Occidental.
Nag-deploy an PRC nin 47 na tawohan asin mga boluntaryo tanganing bantayan an distribusyon kan pinansiyal na tabang, na may katuyuhan na tabangan an mga apektado na makabawi asin masimbagan an saindang mga pundamental na pangangaipo.
Pigdoon man ni PRC Chairman asin CEO na si Richard J. Gordon na an cash assistance nagtatao sa mga pamilya nin dignidad na pilion kun ano an saindang kaipuhan para sa saindang pagrahay, mantang nanunuga man na an Red Cross matabang sagkod na makatindog giraray an mga komunidad.
