LEGAZPI CITY– Mas pinahigot kan Department of Trade and Industry (DTI) sa Albay an pagmonitor kan presyo kan mga basic commodities mantang nagdadangadang na an Undas.
Segun ki DTI Albay Provincial Director Noel Bunao, sa intrevista kan Bombo Radyo Legazpi, regular na nagkokondusir nin monitoring an ahensya asin mas tatawan ngonian nin pokus an mga produktong piggagamit sa pag-obserbar kan Undas, arog kan mga kandila asin mineral water.
Sinabi ni Bunao na sa ngonian, an presyo kan mga ini sa mga merkado sa bilog na Albay nagtitinir sa laog kan Suggested Retail Price (SRP) range.
Tinawan niya nin duon na may mga establisyemento na nagpapabakal pa kan mga ini sa presyong hababa pa sa SRP.
Dugang pa niyang ipinaliwanag na nin huli ta pigklasipikar na basic necessity an mga kandila, naiestablisar an saindang SRP sa paagi kan konsultasyon kan DTI asin mga manufacturers kan kandila.
Manungod sa supply, inasegurar kan DTI Albay an publiko na warang rason para maghadit, nin huli ta igwa nin supisyenteng stock kan mga kandila asin iba pang Undas essentials na available sa mga tindahan.
