LEGAZPI CITY-Kinumpirma kan Sorsogon Police Provincial Office na lima katawo an nagadan huli sa pagsiklab kan dakulang kasulo sa Sorsogon City Public Market pasado alas 11:40 nin banggi kan suudma, Oktubre 24, 2026.
Segun ki Sorsogon Police Provincial Office Public Information Officer Police Lieutenant Colonel Arwin Destacamento, sa intrevista kan Bombo Radyo Legazpi, na duwang babae asin tulong lalaki an biktima asin an saro may kadsadiri kan sarong cubicle store sa nasabing public market.
Nagkaigwa man nin pag-respunde an Bureau of Fire Protection (BFP) asin nagtarabangan kaiba an gabos na BFP unit sa provincia, kun sain na-fire out ini bandang alas 2:25 nin pagka-aga.
Nadukayan suboot kinaagahan an mga biktima sa laog kan comfort room, na pinagtutubudang digdi nagpasiring an mga biktima ngani makasalbar sa kasulo, alagad naabot man liwat ini huli sa hewas kan kalayo.
Sa presente, na-identipikaran na an mga biktima asin pigkokontak na an saindang mga pamilya ngani ipaaram an insidente.
Nagsasagibo na man an Sorsogon PNP nin pre-emptive advisory asin nagkokondusir nin bandilyo, magin sa social media ngani maipaaram sa mga residents an mga fire safety measures asin dae na mautro pa an insidente.
Sa ngonian, dapat na mag-olay an gobierno kan Sorsogon asin market management asin vendors ngani hilingon kun saen an posibleng relokasyon ngani maipadagos pa an hanapbuhay kan mga kababayan.
Pangapudan man kan opisyal sa gabos na ugalion na i-check an mga kagamitan na posibleng magkawsa nin kasulo.
