LEGAZPI CITY—Nagkundusir nin sarong seminar an gobierno provincial kan Sorsogon katabang an mga kapulisan kan provincia mapadapit sa pag-asigurar kan salbado asin mas matoninong na mga eskwelahan sa lugar, ini bilang tugon na man kasunod kan mga karahasan na nangyayari sa nagkapirang eskwelahan sa nacion.
Segun ki Sorsogon Police Provincial Office Public Information Officer Police Major Arwin Destacamento, sa intrevista kan Bombo Radyo Legazpi, inisyatibo ini kan provincia kun sain afuera sa pagsagibo nin police visibility an magibo man nin lectures o symposium sa mga junior high asin senior high na mga estudyante na mapuon sa Hulyo katabang an Municipal Disaster Risk Reduction and Management Office asin iba pang ahensya nin gobierno.
Sa ngunyan wara man na nairehistrong siring na mga insidente sa saindang lugar.
Mientrastanto, nangapudan man si Destacamento sa mga magurang na bantayan nin maray an saindang mga aki, i-monitor an saindang daily activities o surion en kaso nadadawit man sa aktibidad sa saindang cellular phones.
Siring man na i-report sa mga otoridad kun manutaran an kadudang aktibidad nganing sainda man ining tulos na marespondehan.
