LEGAZPI CITY—Tinawan pagbisto an Sorsogon Police Provincial Office bilang Provincial Winner – Special Category para sa programa kaini na Anti-Criminality Defense (ACD), na tinanghal bilang Best Community and Service-Oriented Policing (CSOP) Project sa provincia sa ginibong culminating activity sa Camp General Simeon A. Ola, Legazpi City.
Segun ki Sorsogon Police Provincial Office Spokesperson Police Major Arwin Destacamento, sa intrevista kan Bombo Radyo Legazpi, an programang Anti-Criminality Defense an project initiative kan saindang provincial director na si Police Colonel Alex Daniel o collaborative approach nganing maibsan o malikayan an kriminalidad sa nasabing provincia.
Kabale sa pillar kan programa an pagpasurender sa mga identified drug personality, pagpasurender sa mga loose firearm, pagpasurender o pagtaong-aram sa dati nang may warrant o mga personang nagtatago sa ley, magin an paggibo nin intervention sa mga barangay kan Women and Children Protection Desk na may identified na Child at Risk.
Afuera digdi, kaiba man sa programa an Tanglaw Lahi Program, Inter-Agency Task Force Katrangkiluhan na nakaangkla sa programa kan gobierno provincial kan Sorsogon.
Pagdoon ni Destacamento na an mabebenepisyaran kan programa an mismong namamanwaan.
Sinabi pa kaini na saindang ipagpapadagos an programa huli sa nahling ninda an epekto kaini sa komunidad.
