LEGAZPI CITY-Bukas suboot an messaging platform na Discord sa pagnombra nin sarong representante o sarong local law firm sa Pilipinas, segun sa Cybercrime Investigation and Coordinating Center (CICC).
An online communication platform, katuyuhang magbugtak nin sarong lokal na presensya nganing magserbing representante kaini asin masierto an pagsunod sa mga regulasyon kan nacion.
An planong ini pinag-olayan sa sarong pagtiripon sa pag-ultanan kan CICC—na pinangenotan ni Dir. Usec. Aboy Paraiso, kaiba si Discord Senior Policy Advisor for Asia-Pacific Vasundhara Singh.
An opisyal kan Discord nagbisita sa Pilipinas nganing makipagkoordinar sa gobierno sa pagpakusog kan online child safety asin pagbusol kan mas ligtas na digital space.
An inisyatiba na ini bilang simbag sa nagdadakol na numero kan mga huma na igwang relasyon sa online sexual abuse o exploitation of children’ (OSAEC) asin nihilistic violence extremism (NVE).
Naghagad man nin paglilinaw sa ahensya manungod sa kun an kahagadan para sa sarong lokal na representante o kun an sarong pisikal na opisina kaipuhan nganing mag-operar sa laog kan nacion.
Bilang simbag, pigduon ni CICC Undersecretary Paraiso na an representante dapat igwa nin supisyenteng otoridad tnganing masimbagan an mga isyu, imbes na magserbi sanang punto nin pakikipag-olay.
