LEGAZPI CITY—Nagpuon nang magkundusir nin livelihood trainings para sa mga abacalero an gobierno provincial kan Catanduanes kasunod kan posibleng epekto kan El Niño sa produktong abaca.
Segun ki Philippine Fiber Industry Development Authority (PhilFIDA) Catanduanes Provincial Fiber Officer, Bert Lusuegro, sa intrevista kan Bombo Radyo Legazpi, igwang programa an lokal na gobierno para sa mga abacalero na pigsabayan kan Department of Labor and Employment (DOLE) – Tulong Panghanapbuhay sa Ating Disadvantaged/Displaced Workers (TUPAD).
Mantang nagkundusir naman an saindang ahensya nin livelihood trainings nganing durante kan nasabing panahon igwa nin alternatibong piggibo an abaca farmers siring kan pagtukdo sa mga esposa sa paggibo nin abaca-based products.
Dugang kaini na nagtanom na man nin panibagong abaca sa provincia asin sa ngunyan wara pa man sindang nairerehistrong danyos huli sa tag-init.
Katakod kaini igwa man sindang mitigation measures nganing mapababa an epekto kan El Niño siring kan dae pagbalad sa init kan kahoy nin abaca, pag-ibitar sa pagputol kan marang dahon o paglinig sa irarom kan abaca nganing mapreserbar an tubig asin dae direktang maapektaran an kahoy kaini, asin iba pa.
Mientrastanto, nangapudan si Lusuegro sa abacaleros na i-secure an saindang an abaca plantation areas sa Philippine Crop Insurance Corporation huli sa en kaso man apektado an plantasyon an makakakua sinda nin insurance digdi.
