LEGAZPI CITY-Iprinesentar kan House prosecution panel an testimonya ni AMLC Executive Director Ronel Buenaventura sa Senate impeachment court, nganing patunayan suboot na an P319 milyon hale sa mga kumpanya na nakabase sa China an ipinadara sa Cale88 Foods Corporation—na sarong kumpanya kun saen si Atty. Manases Carpio, an agom ni Bise Presidente Sara Duterte, an igwa suboot nin 47.5 % na interes sa negosyo.
Segun sa private prosecutor na si Atty. Mae Divinagracia, pig-flag kan bangko an tulo sa mga remittances na ini bilang kaduda-duda huli sa malinaw na kawaran nin anuman na legal o trade obligation asin an kawaran nin malinaw na katuyuhan sa ekonomiya.
Sinabi pa kan prosekusyon na haros P4.5 bilyon an naglaog asin nagluwas sa 15 korporasyon na kun saen si Duterte asin Carpio suboot igwang interes sa pag’ultanan kan taong 2022 asin 2025.
Afuera kaini, inireport kan piskalya na an total na kantidad kan mga “covered” asin “kaduda-dudang transaksyon” na direktang imbuelto an mag-agom poon 2007 hasta 2025, an uminabot sa P4.4 bilyon.
Sinabi kan piskalya na an mga rekord na ini kan AMLC gagamiton nganing patunayan an mga alegasyon sa irarom kan Artikulo II kan impeachment case kontra ki VP Sara Duterte.
