LEGAZPI CITY-Kinumpirmar kan Bureau of Immigration (BI) na yaon ngonian sa luwas kan Pilipinas si dating House Speaker Lord Allan Velasco.
Segun sa opisyal na pahayag kan ahensya, wara pang eksistidong Hold Departure Order (HDO) o anuman na derogatory alert kontra ki Velasco na makakapugol saiya sa pagluwas sa nacion, mantang nagsayuma an bureau na magtao nin dugang na detalye sa pagsambit kan Data Privacy Act.
Mientrastanto, sinabi ni National Bureau of Investigation (NBI) Director Melvin Matibag na naglupad si Velasco pasiring sa Nagoya, Japan kan Agosto 30 asin nakatalaan kuta na magbalik sa Setyembre 14, alagad wara pa nin record sa pagbalik kaini sa nacion.
Sinabi man ni Matibag na an agom ni Velasco naghale pasiring sa Hong Kong kaiba an duwang iba pang indibidwal kan Setyembre 24, asin wara man nin rekord kan saindang pagbalik kasunod kan saindang nakatalaan na petsa na Setyembre 27.
Marurumduman na nagatubang sa NBI an dating security aide ni Velasco, na si ex-police officer na si Rodulfo Gracioso Jr., asin nagtuga na nakapag-hatod siya nin labing P2 bilyon ki Bise Presidente Sara Duterte, P1 bilyon ki dating Presidente Rodrigo Duterte, asin P10 milyon ki Rep. Paolo Duterte basado sa ipigsugo suboot kan dating House Speaker.
