LEGAZPI CITY-Pinahimutikan kan kampo ni dating House Speaker Lord Allan Velasco asin Bise Presidente Sara Duterte an mga pahayag kan tinanggal na pulis na si Rodulfo Gracioso Jr., na pig-aakusaran sinda na suboot nagpapadara asin nag-ako nin mga maleta na may laog na bilyones pesos na kwarta.
Segun kay Atty. Rowell Ilagan, tagapagtaram ni Velasco, daeng basehan, gibo-gibo sana, asin pano nin “inconsistencies” an mga alegasyon laban sa dating House Speaker, mientras suboot na malinig an saiyang record sa serbisyo publiko.
Sa suway na pahayag ni Bise Presidente Sara Duterte, mahigot man na pinahimutikan an alegasyon asin sinabi na dae niya bistado si Gracioso, kasabay kan pag-asegurar na preparado an saiyang mga abogado na magsangat nin kaso kontra saiya, oras na makua na an opisyal na affidavit sa National Bureau of Investigation (NBI).
Inapod man kan bise presidente an isyu na sarong “media stunt” asin sarong desesperadong lakdang kan administrasyon, ngani na raoton siya asin ipadagos an impeachment trial kontra saiya.
Mientrastanto, kinumpirmar ni Justice Secretary Fredderick Vida asin kan NBI na naresibe na ninda an affidavit ni Gracioso asin pig-eeksamin asin pig-iimbestigaran na in ngonian kan gobierno.
