LEGAZPI CITY-Tulong tawo an nagadan asin 36 an nairido kasunod kan mga pag’atake sa duwang aeropuerto sa Saudi Arabia, kasabay kan matinding iriwal sa Yemen.
Susog sa mga otoridad kan Saudi civil aviation, saro an nagadan asin walo an nairido sa sarong pag’atake sa King Khalid International Airport sa Riyadh.
Mientrastanto, duwang katawo naman an nagadan asin 28 an nairido sa sarong pag’atake sa mga pasilidad sa Abha Airport.
An grupong Houthi nag-ako kan responsibilidad sa nagkapirang pag’atake, kabali an paggamit nin mga drone laban sa eropuerto sa Riyadh.
Bilang simbag, an coalition na pinangenotan kan Saudi, naglansar nin mga pag’atake laban sa mga target kan Houthi sa Yemen.
An coalition naireport na pigpupuntirya an labing 80 na mga lugar militar kan Houthi sa mga probinsya nin Saada, Hodeidah, Jawf, asin Marib.
Mientras tanto, inatake man kan mga Houthis an Aden International Airport sa Yemen gamit an mga missile asin drone.
Susog sa Yemeni Ministry of Transport, sarong missile an nagtama harani sa runway pirang minuto antes an nakatalaang paglapag kan sarong eroplano hale sa Cairo.
Huli kaini, an eroplano nag-abort sa paglapag kaini asin pig-divert pasiring sa Jeddah, Saudi Arabia.
An iriwal sa Yemen padagos na nagkukusog, na nagresulta sa pag-migrate kan labing 200,000 katawo, segun sa International Organization for Migration.
