LEGAZPI CITY-Kinumpirmar kan Bureau of Immigration (BI) an implementasyon kan Hold Departure Order (HDO) na pinaluwas kan Sandiganbayan laban ki dating House Speaker na si Martin Romualdez, dating Ako Bicol Rep. Elizaldy “Zaldy” Co, asin duwang kaibahan katakod kan P7.44-billion na plunder case.
Segun sa ahensya, nagtitinir sa nacion si Romualdez asin Felicito Cristobal Guevarra, mantang naghale sa Pilipinas si Co asin Joselyn Tragua Serenio antes pa man naipaluwas an kasuguan.
Si Romualdez, presenteng nakakulong ngonian sa infirmary kan New Quezon City Jail-Male Dormitory sa Payatas asin nagsangat na nin “not guilty” plea sa paagi nin videoconferencing.
An mga awtoridad naggigibo nin mga lakdang—kaiba an pakikipagkoordinar sa Interpol—nganing mahanap asin madakop si Co.
Sinabi kan ahensya na estriktong ipapaotob kaini an mga probisyon kan HDO alagad dai pwedeng magpaluwas nin detalyadong personal na impormasyon manungod sa akusado, bilang pagsunod sa Data Privacy Act of 2012.
