LEGAZPI CITY-Ipinaluwas na kan Department of the Interior and Local Government (DILG) ngonian na aldaw, Martes, Setyembre 8, an opisyal na mugshot ni dating House Speaker asin Leyte 1st District Representative na si Martin Romualdez, makalihis na maresibe an isinangat na plunder case.
Ipinahiling an ladawan ni Romualdez sa press briefing sa Camp Crame mantang siya nakahigda sa pribadong ospital sa San Juan City.
Mahihiling man sa ladawan na nakasulot pa ini nin hospital medical gown, nasal, asin intravenous cannula.
Sa nasabing ladawan, imbes na nakasulot si Romualdez nin standard orange shirt kan Philippine National Police-Criminal Investigation and Detection Group (PNP-CIDG) detainee shirt, nakabugtak sana ini sa medical gown kan dating house speaker.
Magigirumduman na nadakop si Romualdez kan Lunes, Setyembre 7 huli sa kasong plunder o plunder.
Nagsangat nin kaso an Ombudsman sa Sandiganbayan laban sa dating House Speaker katakod kan suboot pagkaimbwelto kaini sa labing 7 bilyones de pesos na flood control projects scam asin kickbacks sa manlaen-laen na proyekto poon 2022 hasta 2025.
Sa ibong kaini, ipinaliwanag man kan PNP-CIDG National Capital Region na dai makasulot kan orange na detainee shirt si Romualdez huli ta dai suboot ini makatindog huli sa nagkapirang medical apparatus na nakasulot sa saiyang lawas.
Mientrastanto, mapoon na sa Huwebes ngonian na semana an pagdangog sa kaso ni Romualdez sa Sandiganbayan Third Division.
