LEGAZPI CITY-Uminabot na sa 26 an numero kan mga nagadan huli sa makusog na bagyong “Inday”, basado sa pinakahuring report kan National Disaster Risk Reduction and Management Council (NDRRMC).
Sa kabilugan, pinakadakol an nagadan sa Sarangani na may sampulo, sinundan kan Lanao del Sur na may pito, apat sa Davao Occidental, duwa sa Zamboanga Sibugay, duwa sa Bukidnon, asin saro sa Iloilo.
Apwera sa mga nagadan, siyam an naireport na irido mantang katorse an nawawara sa ngonian. Lakop man an danyos na dara kan bagyo asin habagat na nag-apektar sa labi sa 244,000 na pamilya o katumbas kan labi sa sarong milyon na indibidwal sa manlaen-laen na rehiyon kan nacion.
Padagos an ginigibong operasyon kan mga lokal na gobyerno asin ahensya ngani hanapon an mga nawawara asin magtao nin asistensya sa mga apektadong komunidad.
Liwat na nagpagiromdom sa pangyayari an kahalagahan kan amay na preparasyon asin kooperasyon sa atubang kan mga kalamidad dara kan maraot na panahon.
