LEGAZPI CITY-Nangangapudan an Makabayan bloc ki Presidente Ferdinand Marcos Jr. na isikwal an plano na magtugdok nin US-backed ammunition factory sa nacion na suboot parte kan programang US-led Partnership for Indo-Pacific Industrial Resilience (PIPIR).
Sa sarong pahayag, sinabi kan grupo na ibubugtak kaini sa peligro an Pilipinas asin pwedisir iguyod an nacion sa mga sigalot na kinaiimbueltuhan kan Estados Unidos.
Nanindugan an mga mambabatas na sinda ACT Teachers Rep. Antonio Tinio, Gabriela Rep. Sarah Elago, asin Kabataan Rep. Renee Co, na pagprodusir nin mga bala asin armas an bako lehitimong programang pang-ekonomiya asin nagdadara nin peligro sa seguridad kan nacion orog na sa tahaw kan halangkaw na presyo kan krudo, kuryente, transportasyon asin pagkakan.
Idinagdag pa ninda na unfair an magtagama nin pondo para sa produksyon nin armas mantang nasasakitan an banwaan sa pang-urualdaw na gastos.
Enot nang nagkasundo an Estados Unidos asin an mga kaalyado kaini sa Partnership for Indo-Pacific Industrial Resilience na pagadalan an pagtugdok nin pasilidad para sa pagsasagibo nin ammunition sa Pilipinas.
Mientrastanto, obheto suboot kaini an pagsagibo nin 30-millimeter cannon rounds na pigagamit sa mga military aircraft asin ground vehicle.
Parte man suboot ini kan paghihingoa asin orog pang mapakusog an defense industrial capacity sa rehiyon.
