Bilang simbag sa kasuguan kan Malacañang na magtipid sa enerhiya sa tahaw kan tensyon sa Middle East, ipinaotob na kan Department of Education (DepEd) ang apat na aldaw na onsite work kada semana para sa gabos nin non-teaching personnel kaini puon kasoodma Lunes, Marso 9.
Sa iniluwas na memorandum ni Education Secretary Sonny Angara, itinalaga an aldaw nin Biyernes bilang work-from-home day para sa mga nasabing empleyado, kabale an mga mga nasa contract-of-service asin job order.
Siring man, nilinaw kan DepEd na dae sakop kan direktiba an mga paratukdo. Padagos na susunodon kan mga ini an saindang regular na class schedules nganing masierto an padagos na pagsagibo nin mga klase asin end-of-school-year activities.
An lakdang kan DepEd an direktang sumusunod sa Memorandum Circular No. 114 kan Palasyo na pinirmahan nin Executive Secretary Ralph Recto kan Marso 6.
Obheto kan kasuguan na pahiroon an mga ahensya nin gobyerno na magtipid nganing maibsan an epekto kan volatility sa presyo ng petrolyo huli kan tensyon sa Middle East.
Afuera sa flexible work arrangements, sinugo man kan ahensya na gabos na opisina kaini na magpaotob nin energy conservation protocols.
Target kan ahensya na mapababa nin 10% hanggang 20% ang konsumo sa kuryente asin krudo.
Kaiba sa mga mahigot na lakdang an pagtatakda nin mga air conditioners sa 24 degrees Celsius, pag-activate kan sleep settings sa mga kagamitan sa opisina, asin pagpalsok kan mga bako esensyal na ilaw asin electronics kapag lunch break asin pagkatapos kan oras kan trabaho.
