LEGAZPI CITY- Pigo-obserbaran ngunyan na Nobyembre 2 an International Day to End Impunity for Crimes against Journalists.
Nag-ugat ini sa pagdukot asin paggadan sa duwang French journalists kan Nobyembre 2, 2013 asin an United Nations General Assembly an nagdeklarar sa nasabing petsa bilang aldaw kan pagrumdom sa gabos na nakaka eksperyensya nin harassment asin intimidation.
Segun ki UP Diliman College of Media and Communication Prof. Danilo Arao sa intrevista kan Bombo Radyo Legazpi na maging sa Pilipinas, dapat man na rumdumon an halawig na listahan kan mga ginadan na mamamahayag huli sa saindang pagtatrabaho.
Sinabi kan opisyal na basado sa datos, nasa 200 na mamamahayag na an ginadan huli sa saindang trabaho puon kan taong 1986.
Binalikan pa kaini an datos kan National Union of Journalists of the Philippines (NUJP) na sampulo sa mga work related killings an sa irarom kan presenteng administrasyon.
Katakod kaini, liwat na ipinangapudan ni Arao an pagtataong hustisya sa gabos na mga biktima nin kadahasan asin intimidation.
