LEGAZPI CITY-Pighahagad ni Education Secretary Sonny Angara an suporta kan Senado ngani maibalik asin madagdagan an pondo kan Department of Education (DepEd) para sa masunod na taon.
Kaibanan digdi an mga programang nakatutok sa pagkanuod kan mga estudyante, kapakanan kan mga paratukdo asin pagpapakarhay kan mga pasilidad sa eskwelahan.
Sa pagtalakay kan Senate Finance Committee sa propwestong 2027 budget kan ahensiya, naghagad an DepEd nin dugang na P147.93 bilyon ngani pondohan an mga pangenot na programa asin serbisyong dae lubusang nasakop kan mga propwesto kan national budget.
Sa irarom kan General Appropriations Bill (GAB), nakatagama an P969.79 bilyon para sa DepEd asin mga attached agency kaini, na mas hababa nin P6.17 bilyon kumparar sa orihinal na propwesto sa irarom kan National Expenditure Program (NEP).
Sa pagtalakay kan Senado, iminungkahi an pagkakaigwa nin hiwalay na alokasyon para sa programa ngani na magin malinaw ini asin transparent an pagtagama asin paggamit kan pondo.
Mientras tanto, inaprubahan kan Senate Finance Committee an propwestong budget kan DepEd, kaiba an nagkapirang kondisyon mapadapit sa mga dugang na talakayan asin pagsusumite nin pighahagad na dokumento.
Padagos man na naglalaom an ahensya nin suporta kan mga senador ngani matugunan an kakulangan sa pondo asin maipaotob an mga programang nakatuon sa pagpapamarhay kan kalidad kan edukasyon sa nacion.
