LEGAZPI CITY-Nagsumiter an kampo ni dating Presidente Rodrigo Duterte nin pinagsarong report hale sa mga kinuwa nindang medical experts.
Segun sa abogado kan dating Presidente na si Nicholas Kaufman, na an lakbang an nagsusuporta sa saindang pahayag manungod sa tunay na kondisyon sa salud kan 80-anyos na si Duterte asin kun nata kinakaipuhan na tawan nin libertad hale sa pagkakakulong sa International Criminal Court (ICC) facility.
Sa 12-pahinang report na isinumiter ninda sa ICC Pre-Trial Chamber I, nagsasabing an bagong medical evidence bilang pagsuporta sa Pre-Trial Chamber sa salud kan dating Presidente para sa ppaghampang kaini sa paglilitis.
Nakalatag man sa joint report na an dating Presidente nagkukulang nin executive functioning, nagsapo man suboot nin kakulangan kan kapasidad na magplano, pagkukulang sa marikas na pagdesisyon, nagkukulang sa pisikal na kakayahan, asin warang abilidad na ibitaran an pagbabantay.
Huli suboot digdi an warang kakayahan an dating Presidente na bantaan an mga witness asin raoton an integridad kan imbestigasyon.
Pigmamawot man ni Kaufman na dapat pag-aradan na kan Pre-Trial Chamber an pag-apruba kan interim release ni Duterte huli sa nabanggit na mga kondisyon kan dating Presidente.
Marurumduman na kan Disyembre 5, 2025 nagtalaga an ICC kan panel of experts na mabusisi sa salud kan dating Presidente kun may kakayahan ining magatendir sa pagdangog sa sadiri niyang kaso.
Nakakulong an dating Presdente huli sa kasong crime against humanity hale sa kampanya niya laban sa iligal na droga kan ini Presidente kan ancion siring man kan alkalde siya sa Davao City.
