LEGAZPI CITY—Nagtutubod an mga pamilya kan biktima nin giyera kontra droga na ‘fit to stand trial’ si dating Presidente Rodrigo Duterte makalihis na personal ining mag-atendir sa ikatulong status conference sa International Criminal Court (ICC).
Segun ki Rise Up for Life and for Rights Coordinator Rubilyn Litao, sa intrevista kan Bombo Radyo Legazpi, na sa nasabing conference an nahiling na nagdadangog an dating presidente asin nasasabutan kaini an status conference na taliwas sa mga pigsasabi kan saiyang mga aki asin abogado na maluya na si Duterte.
Nagpapasalamat man ini sa ICC na yaon an determinasyon na ipadagos an gigibohon na paglilitis sa dating presidente.
Sienerto man niya na padagos an saindang koordinasyon sa mga pamilya kan biktima nin war on drugs.
Nangangapudan man si Litao sa mga dae pa nagigin parte kan saindang grupo na makisumaro sainda para sa sarabay na pangapudan sa katarungan asin paninimbagan sa orolay na kadakol na nagadan na namamanwaan sa war on drugs.
