LEGAZPI CITY – Padagos an piggigibong assessment kan Philippine Fiber Industry Development Authority (PhilFIDA) sa danyos sa sector kan pag-aabaca na ipigwalat sa provincia kan Catanduanes makalihis rapaduhon ni Super Typhoon Uwan an Bicol Region.
Segun ki PhilFIDA Catanduanes Provincial Fiber Officer Bert Lusuegro sa intrevista ka Bombo Radyo Legazpi na base sa saindang datos an puminakol na sa labi P1.2B an nairehistrong danyos sa nasambitang sector kun sain an labi P362M an gikan sa fiber used asin labi P881M an gikan sa abaca production areas.
Uminabot man sa labi 30,000 na ektarya kan omahan an nagsapo nin heavy damage mantang labi 6,000 ektarya man nin omahan an nagkaigwa nin moderate damage na kadaklan an nairehistro sa norteng parte kan provincia.
Pagdoon niya pa na haros nagbubuwat pa sana an nasabing sector makalihis padapaon man kan Super Typhoon Pepito na nagrapado man sa provincia kan November 2024 alagad pinadapa na naman ini ngonian ni Bagyong Uwan.
Pigtaram pa kan opisyal na uminabot na sa poco mas o menos 13,000 na mga abaca farmers sa provincia an apektado kan pangrarapado kan nasabing raot nin panahon sa ibong kan dae ini direktang nagtama sa kadagaan kan Rehiyon.
Padagos man sa pagtatao nin tabang sa mga abaca farmers an mga Gobierno Provincial asin iba pang ahensya kan gobierno mantang nakatalaan man sindang magbarewas nin asistensya para sa saindang pagbuwat liwat.
Pwedesir man na abuton nin saro sagkod duwang taon an kakaipuhanon nganing maka-recover an saindang sector kun kaya laoman na suboot na makaka-apektar ini sa haros 50% sa production supply nin abaca sa enterong nacion.
Pangapodan ni Lusuegro sa mga apektadong abacaleros na dae mawaran nin paglaom huli ta warang patod na an saindang ofisina sa paggibo nin lakdang nganing makapagtao nin magkakanigong tabang sa sainda.
 is continuing its assessment of the damage to the abaca sector in the province of Catanduanes after the impact of Super Typhoon Uwan on the Bicol Region.){kind=link}